Barsaat Aur Birha

Pattiyon ko toh aksar zhadte dekha hai maine
Inme se sundar kuch ko apni kitabon ke beech sambhal kar rakha hai kai baar maine

Tez hawaa ke jhonkon se paido ko bhi girte dekha hai maine
Lekin kal ka nazaara kuch aur hi tha

Garmi se pareshaan main baarish baarish khoob keh rahi thi, intezaar kar rahi thi 

Aur kal jab aayi baarish toh meri khushi ka koi thikana na tha

Lekin kehte hai na har cheez ke do pehlu hote hain 

Yahan main khushi se jhoom rahi thi 

Us barsaat ka lutf utha rahi thi 

Aur wahan kuch bahut dardnaak sa ho raha tha

Kuch samay baad ek ped ko badi behrami se tootte bikharte hue dekha

Patte toh the hi nahi kewal ped hi tha 

Phir bhi kaafi mann bhaata tha 

Kuch alag si kashish thi usme 

Aur main ghanto dekhti thi use 

Bada sukoon mehsoos hota tha

Lekin kal uski chavi ko tootte dekha

Uski do daaliyon ko usse alag hote dekha

Reh reh kar bahut khayal aaye mere mann mein 

Jab choti choti chot pe itna dard hota hai humein 

Toh kaise laga hoga us ped aur uski daaliyon ko 

Inme bhi toh jaan hoti hai na 

Bas ek hi pal mein badal gayi soorat uski 

Kya dard se kharhaya hoga unhone 

Kya bichadne ka gam sataya hoga unhe…

Barsaat tham gayi aur zindagi phir lagi daudne 

Woh waise bhi kahan thamti hai kisi ke liye 

Lekin bahut ajeeb lag raha hai mujhe ab bhi

Us toote hue ped ko dekhkar 

Uski tooti hui daaliyon ko bikhra dekhkar 

Aur jab mujhe lag raha hai aisa toh unhe kaisa lag raha hoga 

Kya woh kos rahe honge us baarish ko 

Ya apni lachaari pe dukh mehsoos kar rahe honge

Jo bhi hai, main mehsoos kar sakti hun unke dard ko 

Ek aah si uth rahi hai 

Aur ab lag raha hai 

Shayad agli baar baarish ko yaad karne se bhi thoda katraongi main!